Авганистан: 40 загинати во бомбашки напад во Кабул

Најмалку 40 лица загинаа во денешните самоубиствени напади врз авганистанската новинска агенција „Воис“ и блискиот културен центар „Табајан“ во главниот град на Авганистан, Кабул.

Портпаролот на Министерството за внатрешни работи Насрат Рахими изјави дека најмалку 40 лица се убиени и 30 повредени, во најновиот во серијата напади во Авганистан насочени против медиуми.

Нападот се случи за време на утринската панел-дискусија во културниот центар, при што најголем дел од присутните биле студенти.

Сајед Абас Хусини, новинар во агенцијата „Воис“ изјави дека за време по првичната експлозија, следела уште најмалку една експлозија. Тој соопшти дека во нападот е убиен еден новинар, а еден е повреден.

Очевидци соопштуваат дека во нападот е предвикана огромна штета во областа, населена претежно со шиитски муслимани.

Засега никој не ја презеде одговорноста за нападот, а портпаролот на талибанците Забинула Муџахид преку Твитер негираше учество на таа група.