Поранешната сопруга на Бил Гејтс згрозена од скандалозните откритија за него, Епштајн и венеричните болести

Поранешната сопруга на Бил Гејтс изјави дека чувствува неверојатна тага откако беа објавени е-пораки од досието на сексуалниот предатор Џефри Епштајн во кои тој тврди дека нејзиниот тогашен сопруг се обидел тајно да ѝ даде лекови против сексуално преносливи болести, објавува „Телеграф“.

Мелинда Гејтс (61) го повика својот поранешен сопруг, милијардерот и основач на „Мајкрософт“, како и други познати луѓе поврзани со Епштајн, да одговорат на обвинувањата детално опишани во три милиони новообјавени документи поврзани со осудениот педофил.

„Ниедна девојка никогаш не треба да биде доведена во ситуацијата во која Епштајн ги стави и што и да им се случи на различните луѓе околу него“, рече таа во интервју за НПР. „Тоа е повеќе од срцекршачко. Се сеќавам дека тие девојки беа на возраст на моите ќерки. Тешко ми е лично секогаш кога ќе се појават тие детали бидејќи ми враќаат спомени на некои многу, многу болни времиња во мојот брак“, рече таа.

Таа нагласи дека луѓето што ги спомена Епштајн мора да одговорат на прашања за тоа што се случило. „Значи, какви и да се прашањата за работи што не ги знам, а не можам да знам сè, тоа се прашања за тие луѓе, па дури и за мојот поранешен сопруг. Тие мора да одговорат на тие работи“, рече таа, додавајќи дека е среќна што е подалеку од сето тоа.

Епштајн напиша во е-пошта во 2013 година дека основачот на „Мајкрософт“ му побарал антибиотици поради некоја венерична болест што тајно можел да ѝ ја пренесе на неговата тогашна сопруга Мелинда.

Една од пораките откри дека Епштајн пишувал за „помагање на Бил да добие лекови за справување со последиците од сексот со руски жени“ и „олеснување на неговите нелегални средби со мажени жени“. Во посебен е-мејл, Епштајн му кажал на Питер Менделсон, неговиот пријател и долгогодишен британски политички моќник, дека „монструозно се забавувал“ со Гејтс во Сиетл.

Портпаролот на Бил Гејтс ги нарече тврдењата „апсолутно апсурдни“ и рече дека е-поштата е напишана од „докажан лажго“. „Единственото нешто што овие документи го покажуваат е фрустрацијата на Епштајн што немал постојана врска со Гејтс и колку далеку бил подготвен да оди за да го фати во замка и да го наклевети“, рече портпаролот на Гејтс.

Е-поштата во која се споменува Гејтс е меѓу трите милиони документи што Министерството за правда на САД ги објави на 30 јануари, што дополнително ја разоткри врската на предаторот Епштајн со некои од најбогатите и најмоќните луѓе во светот.