(Видео) Пендаровски: Не можам да го чувам мандатот во фиока

Не можам да го чувам мандатот во фиока и морам да го доделам во рок од десет дена од верификувањето на мандатите на пратениците. Aко лидерот на СДСМ, Зоран Заев не обезбеди 61 пратеник за 20 дена,  ќе го врати, изјави претседателот Стево Пендаровски по средбата со лидерот на ВМРО-ДПМНЕ, Христијан Мицкоски, кој попладнево со неколку пратеници беше во Вила Водно за да бара образложение зошто Пендаровски му го дал мандатот на Заев без мнозинство.

Пендаровски рече дека според член 90 од Уставот, со верификацијата на мандатите почнува броењето на десет дена претседателот да го даде мандатот и наведе дека така било и во 2006 година, и во 2016 година. Пендаровски како аргумент зошто му го додели мандатот на Заев рече дека вчера единствено тој од партиските лидери му се јавил и му кажал дека е на добар пат да обезбеди мнозинство.

-Најмногу прашања беа дали и на кој начин тој ме увери дека има мнозинство. До овој момент 61 пратеник нема ниту една партија, но Заев се јави вчера и рече дека во преговорите со партиите тој е на добар пат да обезбеди мнозинство. До денес ниту една партијата не се јави, а мене роковите ми течат. Не можам да го земам мандатот и да го чувам во фиока, должен сум да го дадам мандатот. Немам намера мандатот да го носам дома и да нема институции кои ќе се формираат, рече Пендаровски.

Потоа било отворено прашањето зошто Пендаровски не барал гаранции, а неговото образложение е дека ниту еден претседател од Киро Глигоров досега не барал матични броеви, нотарски заверени изјави освен неговиот претходник, Ѓорге Иванов, кој на Заев му побара гаранции при доделувањето на мандатот.

-Моето убедување е дека на луѓето мора да им се верува на зборот, затоа што и тие имаат одговорност. Ако Заев за 20 дена не формира влада, ќе си го врати мандатот. На денот на гласањето во Собрание се утврдува дали има мнозинство или не, рече Пендаровски. Тој вели дека обезбедувањето на мнозинството не може да биде сокриено.

За најавата на Мицкоски дека ќе ги замрзне односите со претседателот тој рече дека тоа е негова одлука во едно демократско општество, но вели дека е сигурен дека ако Заев не обезбеди мнозинство Мицкоски прв ќе го побара мандатот од него, и покрај замрзнатите односи.

Околу шпекулациите за нови избори, Пендаровски рече дека единствен начин да се случи тоа е Собранието да се самораспушти со најмалку 61 глас .

„Ако нема 61 глас за самораспуштање, нема друг начин со Уставот. Во некои устави во светот на претседателот му се дава мандат со експлицитна уставна норма, ако не успее да се направи влада во одреден рок, со свој акт да го распушти собранието.Јас такво право и овластување немам со нашиот Устав. Значи, може така да тераме со месеци и да се редат сите политички партии, но нови избори се можни само со 61 глас за самораспуштање на Собранието“, рече Пендаровски, па додаде:

-Имаше повици од некои експерти, да не кажам и квази експерти – немој да му даваш на вториот, третиот, ако првиот не направи мнозинство, одиме на нови избори. Во ред. Но, имаме ли 61 рака да се самораспушти парламентот? Ако Мицкоски има намера да доаѓа во една таква претпоставена ситуација, тогаш мора да обезбеди 61 глас да го распушти парламентот. Нема друг начин, рече Пендаровски.

Според него, ако се оди по таа логика и ако нема 61 глас за самораспуштање, тогаш Оливер Спасовки ќе биде технички премиер 4 години.