Бислимовски: Сите потршувачи можат да излезат на слободниот пазар на електрична енергија

Бислимовски: Сите потршувачи можат да излезат на слободниот пазар на електрична енергија
Од 1 јануари годинава целосно е либерализиран пазарот на електрична енергија во земјава и сите потрошувачи, вклучувајќи ги и домаќинствата можат да излезат на слободниот пазар, но во моментов на домаќинствата не би им се исплаќало и токму тоа е причината што снабдувачите не им понудија пакети, порача денеска претседателот на Регулаторната комисија за енергетика (РКЕ) Марко Бислимовски.

-Во овој момент во регионот и во земјава набавната цена на електричната енергија на слободниот пазар изнесува помеѓу 70 и 80 евра за мегават час. Кога на тоа ќе се додаде и трошокот за мрежарина, што треба да го плати секој потрошувач, кој за домаќинствата изнесува 30 евра за мегават час, излегува дека вкупната цена што би требало да ја плаќаат домаќинствата доколку излезат на слободниот пазар изнесува околу 105 до 110 евра. На регулираниот пазар, каде цените ги определува РКЕ, просечната цена за домаќинствата е околу 75 евра за мегават час со вклучена мрежарина, појасни Бислимовски на денешната прес-конференција.

Посочи дека со овие цени во овој момент нема никаква логика домаќинствата да излезат на слободниот пазар, бидејќи нивните трошоци на тој начин би се зголемиле за околу 30 отсто.

-Со Законот за енергетика токму затоа е поставен заштитниот механизам „универзален снабдувач“, за кого најголемата државна компанија за производство на електрична енергија АД ЕЛЕМ им обврска да обезбеди 80 отсто од енергијата по производна цена од 39,6 евра за мегават час, што ја има определено РКЕ со последната одлука од јуни 2018 година. Плус, има потреба од увоз што во текот на годинава го реализира ЕВН Македонија АД Скопје, и од тие причини цената на регулираниот пазар за домаќинствата е 75 евра. Доколку излезат на слободен пазар би била помеѓу 105 и 110 евра. Од тие причини  снабдувачите не гледаат логика да им понудат на домаќинствата електрична енергија, бидејќи и самите не веруваат дека некое домаќинство би се решило да купи струја на слободниот пазар со што би му се зголемиле трошоците за 30 отсто, потенцира Бислимовски.

Кај малите потрошувачи е исплатливо, нагласи, бидејќи до либерализацијата на регулираниот пазар плаќаа така наречена „индустриска струја“ која просечно ги чинеше по околу 150 евра за мегават час.

-Набавната цена за сите снабдувачи е од 70 до 80 евра и кога на тоа ќе се додаде мрежарината  доаѓа од 105 до 110 евра вкупни трошоци кои би ги имале малите потрошувачи што досега плаќаа индустриска струја. Со тоа нивниот вкупен трошок ќе биде од 105 до 110 евра. Од овие причини има голем интерес кај сите снабдувачи да им нудат електрична енергија, бидејќи реално за 20 до 30 отсто им се намалува вкупниот трошок за електрична енергија. Затоа, се додека  не се намали цената на регионалниот пазар и не стане интересна за домаќинствата, тие се заштитени со универзалниот снабдувач, рече Бислимовски.

Нагласи дека сме прва земја во регионот во која се спроведе концептот за избор на универзален снабдувач со тендер и додаде дека земји кои се членки на ЕУ не се осмелија да објават таков тендер и по автоматизам по целосната либерализацијата на пазарот ги оставија постоечките снабдувачи, што произлегоа од старите вертикално интегрирани компании, да продолжат да ја вршат дејноста како универзален снабдувач.

Споделување со вашите пријатели: