I akuzuari Trajkovski për “27 prillin”: Kërkoj të më dënoni për atë që e kam bërë, jo për terrorizëm
Nga Gjykata kërkoj të më dënojnë për atë që e kam bërë, dhe jo për terrorizëm. Gabimi i vetëm është që kam qenë në vend të gabuar në kohë të gabuar, theksoi i akuzuari Vllatko Trajkovski në fjalët përfundimtare të gjykimit për ngjarjet në Kuvend më 27 prill të vitit 2017.
Trajkovski theksoi se që të bëhet diçka, duhet të ekzistojë qëllim, ndërsa që të mos ndodh ajo që ndodhi, sipas tij, nuk është dashur të hapen dyert në Kuvend.
“Të gjithë e dimë se dyert i hapën Kërsto Mukoski dhe Sasho Vasilevski, me urdhër të atij që ka porositur policë për në fshat”, theksoi i akuzuari Trajkovski.
Për deklaratat e të pandehurit, ndërsa tani i amnistuar Stefan Mlladenovski, Trajkovski tha se janë kuptuar shumë punë, por jo edhe puna që ai e ka bërë në Kuvend.
“Hari Lokvanec në deklaratën si dëshmitar në këtë rast tha se kur ka dalë nga pres-salla është goditur në kokë nga një person me kaçule. Ai person është Stefan Mlladenovski, tha Trajkovski.
Në lidhje me deputetin Sashko Kostov, Trajkovski tha se ai e ka ofenduar dhe e ka fyer, pas së cilës ka marrë aparat kundër zjarrit dhe e ka lagur. Potencoi se deputeti ka ngritur dorë, me ç’rast nga frika të mos sulmohet Trajkoski i ka dhënë dy-tre goditje nga të cilat Kostov ka rënë dhe menjëherë është ngritur. Për akuzën se ai e ka goditur Radmilla Shekerinskën, Trajkovski tha se në incizime shihet se nuk e godet ai, por personi i cili e mbron.
Në Gjykatën Penale në Shkup për momentin fjalët përfundimtare i jep i akuzuari Uillijam Mihajlovski.
Procesi gjyqësor filloi në muajin gusht të vitit të kaluar dhe e udhëheq Dobrilla Kacarska, ndërsa përfaqësues i të akuzuarve është Villma Ruskovska. Procesi filloi kundër 33 të akuzuarve, por me Ligjin për amnisti janë falur gjithsej 15 persona.
Në bankën e të akuzuarve mbetën: Mitko Çavkov, Dushko Lazarov, Goran Gjoshevski-Levi, Mitko Peshov, Oliver Popovski, Munir Pepiq, Abdulfeta Alimi, Oliver Radullov, Igor Durlovski, Jane Çento, Igor Jug, Aleksandar Vasilevski-Ninxha, Nikolla Mitrevski-Kolo, Mlladen Dodevski, Gorançe Angelovski, Vllatko Trajkovski dhe Villijam Mihajlovski, të cilët akuzohen se kanë bërë vepër penale rrezikim terrorist të rendit kushtetues.