BDI: Nuk ka kthim prapa nga Ligji i gjuhëve
Bllokimi i ligjit për gjuhët dhe ligjet tjera reformuese, kanë shtyrë kryeparlamentarin Talat Xhaferi bashkë me opozitën dhe shumicën parlamentare që nëpërmjet takimeve larg opinionit, të kërkojnë zgjidhje për amendamentet e opozitës.
Zv/kryeministri për çështje evropiane Bujar Osmani pranon se partnerët e koalicionit akoma nuk kanë gjetur formulën e miratimit të ligjit, njofton Alsat-M.
“Unë mendoj se ende ka hapësirë që opozita të jetë më e arsyeshme në lidhje me Ligjin për përdorimin e gjuhëve sepse ai është proces ireverzibil, nuk ka kthim prapa në këtë proces i cili ka marrë besimin e 69 deputetëve. Mendoj se opozita ka pasur mundësi historike që ta ndryshojë sjelljen ndaj shqiptarëve, pra ndaj shoqërisë së dytë etnike në Maqedoni por edhe ndaj vetë proceseve”, deklaroi Osmani nga BDI.
VMRO-DPMNE-ja mbron qëndrimin se nuk do tërheqin asnjë nga amendamentet e dorëzuara.