Ademi: NATO na bashkon të gjithëve

Referendumin e 30 shtatorit e shohim si një akt të rëndësishëm në historinë më të re të vendit tonë, ndërsa fushatat që po i bëjnë partitë politike i konsiderojmë si agjendë përtej programeve politike dhe ideologjike, dhe sigurisht se anëtarësimi i vendit në familjen e NATO-s dhe në BE na bashkon të gjitha partitë politike shqiptare në Maqedoni. Kështu në një intervistë në RTVM2 ka thënë ministri i Arsimit dhe Shkencës, Arbër Ademi, i cili ka ftuar të gjithë qytetarët, pa dallim etnie dhe partie politike, të mbështesin Referendumin dhe me këtë, ti jepet fund bllokadës së vendit.

Në këtë intervistë, Ademi ka informuar se Bashkimi Demokratik për Integrim tashmë ka formuar 35 shtabe komunale, ndërsa aktivitetet po rrjedhin sipas programit që kjo parti tashmë e ka miratuar.

“Përpos agjendave të takimeve të kreut të partisë, Ali Ahmeti, edhe shtabet tashmë kanë agjendat rreth Referendumit, interesimi i madh i qytetarëve e bën jetike qëllimin e vendit për të ecur përpara. Deri tani nuk kemi vërejtje, por përkundrazi, kemi përshtypje të mira rreth fushatës deri më tani”, është shprehur Ademi.

Shqiptarët në Maqedoni, dhe jo vetëm shqiptarët, por të gjitha etnitetet që përbëjnë strukturën shtetërore me kohë e duan Maqedoninë brenda NATO-s, ka thënë gjithashtu Ademi.

Në veçanti, shqiptarët mezi e kanë pritur këtë formë, që përmes Referendumit, të vendosin për t’u bërë pjesë e NATO-s dhe BE-së. Kështu që, nuk kemi nevojë për t’i bind shqiptarët dhe kjo fushatë nuk është vetëm e BDI-së apo vetëm e shqiptarëve, por është përtej politikës dhe me këtë, tani është momenti që të dëshmojmë që së bashku, të votojmë dhe të vendosim për të ardhmen e vendit.

Ademi ka folur edhe për akuzat e fundit të opozitës dhe individë të caktuar se Marrëveshja për emrin cenon identitetin e shqiptarëve.

“Shqiptarët nuk kanë problem me identitetin e tyre dhe askush në asnjë moment nuk e ka cenuar identitetin e shqiptarëve jo vetëm këtu, por pa dallim ata ku jetojnë. Dhe, duke e marrë në konsideratë peshën e Marrëveshjes së Prespës, jemi të bindur se kjo marrëveshje i hap perspektivë të gjithë qytetarëve, duke përfshirë edhe këtu shqiptarët. Kështu që në këtë moment, janë të paqëndrueshme akuzat se cenohet identiteti i shqiptarëve me Marrëveshjen e Prespës”, ka thënë

Ademi, duke mohuar zërat e opozitës shqiptare se BDI në Marrëveshjen e Prespës ka qenë dekor.

“Shqiptarët nuk ishin dekor dhe nuk kanë qenë edhe më herët dekor. Veçanërisht, pas konfliktit të 2001-shit dhe pas themelimit të BDI-së si parti politike, ne kemi dhënë shembuj të shumtë për përcaktimin tonë strategjik. Pjesë e bërthamës ideologjike, sidomos në BDI, është integrimi në BE dhe në NATO. Këtë e kemi dëshmuar se jemi arsyeja dhe ndërgjegjja edhe brenda shoqërisë dhe brenda Qeverisë në mbrojtje të kësaj strategjie”, është shprehur Ademi.

“Dëshira ime është që, nëpërmjet një procesi inkluziv, edhe pozita dhe opozita të përgatisin dhe të miratojmë ndryshimet kushtetuese, sepse ne e dimë se cila është lëndë diskutimi dhe lëndë për miratim në Parlamentin e Maqedonisë, sepse ajo është lëndë nga Marrëveshje e Prespës. E dimë se para se të arrihet kjo marrëveshje, kishte tryeza të përbashkëta, ndërsa të gjithë ishin të kyçur në këto interesa të vendit që tejkalojnë çdo agjendë partiake. Kështu që, Maqedonia dhe i gjithë rajoni e ka të qartë se ky proces stabilizon Ballkanin dhe të gjithë së bashku jemi përfitues duke i mbyllur proceset e hapura që kemi”, tha Ademi, duke përjashtuar mundësinë që Referendumi i 30 shtatorit të dështojë.

“Investimi dhe mundi është aq i madh sa nuk mendoj dhe nuk besoj se referendumi do të dështojë. Qëllimi dhe opsioni i vetëm për anëtarësimin e Maqedonisë në NATO dhe në BE është primare së pari mbi politikanët e zgjedhur, mbi Qeverinë dhe mbi qytetarët, ndërsa atmosfera tashmë dihet”, u shpreh në RTVM2, ministri i Arsimit, Arbër Ademi./Gazeta e Pavarur